Á þjóðhátíðardag Íslendinga, þann 17. júní, kom í ljós hvaða plötur lentu 20 efstu sætunum í
Leitinni að 100 bestu plötum Íslandssögunnar sem Rás 2, Tónlist.is og Félag hljómplötuframleiðanda hafið staðið að frá því í mars. Önnur breiðskífa Sigur Rósar,
Ágætis byrjun, var valin besta plata Íslandssögunnar og fast á hæla hennar fylgdu Lifun með Trúbrot og breiðskífa Megasar og Spilverks þjóðanna, Á bleikum náttkjólum.
Sigur Rós á tvær aðrar plötur á topp 20, Með suð í eyrum við spilum endalaust lenti í 9. sæti og Takk... lenti í 20. sæti. Björk kemur við sögu á þrem breiðskífum og Bubbi Morthens og Emilíana Torrini eiga tvær plötur á topp 20 ásamt Stuðmönnum og Spilverki þjóðanna en athygli vekur að Valgeir Guðjónsson er í stóru hlutverki á fimm plötum sem lentu í 20 efstu sætunum.
Þess má geta að 10 ár eru síðan að Ágætis byrjun kom út og er
heimasíða sveitarinnar að halda upp á það um þessar mundir. Heimasíðan býður nú notendum síðunnar að sækja tónleikaupptöku frá útgáfutónleikum plötunnar frítt.
Upphaflega voru 485 íslenskar breiðskífur í boði, breiðskífur sem innihéldu frumútgefnar upptökur og uppfylltu hefðbundin skilyrði um að teljast breiðskífur eða LP plötur. Undanskildar voru því smáskífur, EP plötur, safnplötur og annað slíkt.
Í kjöri 100 manna dómnefndar og með víðtækri þátttöku almennings voru valdar þær 100 plötur sem bestar þykja og í seinni hlutanum voru því aðeins þessar 100 plötur í boði og ætlunin að raða plötunum í sín endanlegu sæti á listanum góða.